施丹弱項皇馬作客獻細

2019-04-15 09:39:32 来源:网络

周一受注賽事唔多,不過阿King一樣搵到好嘢,重心推介係西甲獨腳戲皇家馬德里作客鬥雷加利斯。自從施丹回巢後,皇馬3次贏波都係主場比賽,對住主場表現硬淨嘅雷加利斯或遇一定阻力,轉捧2.5球細盤最穩陣。

(Now 632周二凌晨3時直播)

皇馬由施丹重掌帥印後,4場聯賽攞到3勝1負,3次贏波都係主場比賽,唯一作客以1比2輸畀華倫西亞,客場水準仍有待改進。雷加利斯今季主場聯賽曾經擊敗巴塞隆拿及打和馬德里體育會,西盃亦贏過今場對手皇馬,絕非冇還擊之力,雷加利斯近7場聯賽總入球全開2球或以下,今場揀中位數2.5球入球細。

串阿特蘭大讓球勝科隆勝
另外兩關賽事,意甲阿特蘭大主場鬥安玻里,阿特蘭大現時落後多踢1場嘅「4哥」AC米蘭3分,今場贏波就可追至同分,有力爭奪下屆歐聯入場券;安玻里雖亦要搶分護級,不過佢哋係今季意甲作客成績最差球隊,15場聯賽只得4和11負,包括最近5連敗,捧阿特蘭大讓球主勝。(無綫myTV Gold 301、Now 638、有線614及654台周二凌晨2時30分直播)

最後德乙榜首大戰,1哥科隆主場鬥2哥漢堡。科隆上場雖以4比4打和杜伊斯堡,聯賽6連勝走勢告終,不過狀態及士氣點都好過連續3場失分嘅漢堡,科隆主W捧得過。